白头毛

白头毛

每一改发觉时间愈行愈紧，

袂赴适应的头鬃着急甲有时白，

你染一个佮黄昏相像的头毛，

亲像叶仔飘落的模样，

对着流水跋一个银角仔下愿。

只是愿望共你的青春借走，

敢会是仝一个时阵？

横直忝矣，蝶仔迷路嘛是媠，

佮天顶的纸飞行机仝款，

想欲飞去阁较远的所在，

听蝉仔唱囡仔歌。

白头毛倚伫鬢边，

有时仔听着雷声，有时仔沃着雨，

就算讲乌云经过，

白翎鸶嘛会倚来开讲。

会记得曝月光的时阵爱微微仔笑，

星仔若是对你(目聂)目，

爱温柔的感觉家己，

梦若愈媠着爱愈清醒，

等待春天来的时阵亲像风。