台灣胸坎

台灣胸坎

親像初戀

第一遍摸著查埔人的胸坎

電一下！手隨勼轉來

身軀擋袂牢

規个人顛倒予吸入去胸坎內面

感覺燒燙燙

一卷一卷

一重一重，那燒那滾

阮若跋落去大鼎糋油的肉卷

心臟咇噗跳

火山欲噴出來的前兆

過去茫茫渺渺

這陣來到惜別的海岸

摸著千千萬萬冬閣一直定定

咧等人！所愛的夢

澎湖玄武岩

徛e，海峽大廳的閘屏

倒e，房間的眠床

橫橫直直，攏是咱當初睏過的枕頭

眠夢時常轉來 in兜

就是你的胸坎

阮頓印仔保證，一粒心臟閣咇噗跳

毋是驚火燒燙燙，是驚人所向

未來茫茫渺渺

註：

1‧勼(kiu)轉來：縮回來。

2‧大鼎糋(tsìnn)油：大鍋油炸。

3‧閘屏(tsa̍h-pîn)：屏風。

4‧頓印仔：蓋章。

5‧in兜：他家。